Ish Ministri i Brendshëm Saimir Tahiri ka marrë një tjetër “ndëshkim” nga ana e kolegëve të tij në PS.
Fjala është për një tjetër detyrë që Tahiri humbet në kuvendin e Shqipërisë. Tashmë i vetmi “titull” që Tahiri mban është ai i deputetit, pasi PD këtë të enjte kërkoi nga kryetari i kuvendit Gramoz Ruçi, që ish Ministri të hiqet nga delegacioni i palës shqiptarë në komisionin që diskuton me PE-në për ecurinë dhe integrimin e vendit në BE.
Kërkesën e ka bërë kryetari i Komisionit të Integrimit Genc Pollo dhe ajo është pranuar nga ana e Kryetarit të Kuvendit Ruçi. Pollo është shprehur se prania e tij në Komisionin parlamentar të stabilizim asociimit Shqipëri- BE, figura e Tahirit do të dëmtonte reputacionin e vendit.
Kujtojmë se disa muaj më parë, Tahiri u zhvesh nga të gjitha funksionet e tij në Partinë Socialiste dhe u largua nga grupi parlamentar. Saimir Tahiri mbetet ende njëri ndër politikanët më të “lakuar” të kohëve të fundit për shkak të dyshimeve të mëdha që ranë mbi të kur u bënë publike përgjimet e siguruara nga autoritetet italiane, kundrejt grupit kriminal të Habilajve.
Ish Ministri i Brendshëm më jetëgjatë i pluralizmit akuzohet nga Prokuroria e Krimeve të Rënda për shpërdorim të detyrës, korrupsion dhe pjesëmarrje në trafik ndërkombëtar të drogës. Vetëm ditët e fundit prokuroria ka shtyrë edhe më tutje hetimet mbi dosjen e Tahirit, e cila u hap në muajin tetor të vitit të kaluar./Gazeta Express