Prishtina dhe Beogradi kanë shënuar përparim në përafrimin e qëndrimeve me çështjet që janë të lidhura me telekomin.

Kreyenegociatorja e Kosovës Edita Tahiri konfirmoi pas përfundimit të takimit të grupeve punuese se palët janë dakorduar me elementet e planit të zbatimit.

Sipas saj, Kosova do merr kodin telefonik ndërsa kërkesën në emër të vendit do e bëj Austria. Gjithashtu ekziston pajtimi që Operatorët nga Kosova e Serbia të bashkëpunojnë në fushën e roamingut me qëllim të zbritjes së tarifave.

Ndërsa, sipas kryenegociatores kosovare, do lejohet përkohësisht një kompani e re e telefonisë në Kosovë e cila do ketë fushëveprim të kufizuar. Tahiri insiston se këtu nuk bëhet fjalë për operator të ri të telefonisë meqë ai merret në Kosovë vetëm me tender, transmeton rtk.

Gjithnjë sipas delegacionit kosovar, Prishtina dhe Beogradi janë pajtuar që gjatë këtij muaji sërish të takohen në Bruksel dhe gjatë dy ditëve rresht të precizojnë secilin detaj të planit të zbatimit në lidhje me telekomin në mënyrë që kjo gjë më pas të kaloj tek kryeministrat në takimin e tyre të ardhshëm.

Nesër grupet punuese takohen sërish për të diskutuar sigurimin e automjeteve. Kjo çështje tanimë ka pëlqimin e palëve andaj sipas kryenegociatores Tahiri prioritet mbetet përmbyllja e kësaj teme dhe sipas planit nënshkrimi i marrëveshjes më datën 4 qershor.