Bashkimi Evropian do të dërgojë në Greqi dhe Itali policë për të luftuar terrorizmin dhe për të ndihmuar autoritetet në të dyja vendet për të kërkuar terroristët e mundshëm mes refugjatëve, njoftoi koloneli spanjoll, Manuel Navarre, në një intervistë me gazetën “El Pais”.
“Ky është një koncept i ri, i cili është duke u zhvilluar. Janë ftuar oficerët e punësuar në departamente të ndryshme në vendet anëtare, të trajnuar nga Europoli. Deri në verën e këtij viti do të jenë gati për të filluar punën“, tha Navarra.
Rruga mesdhetare është një nga kanalet kryesore të mbërritjes në BE të refugjatëve nga Afrika dhe Lindja e Mesme.
Që nga fillimi i vitit, përcjell albinfo.ch, sipas Organizatës Ndërkombëtare për Migrim në Evropë arritën në Mesdhe rreth 180 mijë imigrantë.
Sipas shumë ekspertëve, ekziston rrezik potencial që në mesin e tyre të ketë terroristë.