Kryetari i Kumanovës, Zoran Damianovski në një konferencë të jashtëzakonshme për media të Shtabit Komunal të Krizës ka thënë se numri i atyre që janë larguar nga shtëpitë e tyre për shkak të përleshjeve të armatosura nuk dihet pasi që nuk kanë informacione zyrtare, por vetëm nga mediat dhe rrjetet sociale.

Ai, po ashtu nuk ka dhënë detaje as për numrin e të vrarëve apo të plagosurve, duke ju referuar vetëm të dhënave të MPB-së maqedonase, raporton Indeksonline.

Damianovski tutje tha se Kumanova shquhet për tolerancë ndëretnike dhe multikulturalizëm, prandaj kërkoi që kjo të ruhet edhe më tej.

I pari i Kumanovës, po ashtu ka njoftuar se ndërpritet procesi mësimor deri në qetësimin e gjendjes, kurse katër objekte komunale janë liruar për t`i pritur refugjatët e zonës së përleshjeve./Indeksonline/