Lipjan, 31 tetor – Komuna e Lipjanit ka së paku tri probleme të mëdha me të cilat nuk po merret pushteti lokal. Kjo për faktin se ekzekutivi komunal po qëndron indiferent ndaj mungesës së ngrohtores së qytetit, ndaj kundërmimeve që vijnë nga deponitë e egra, e sidomos nga Ferma e Pulave dhe në fund ka një mungesë të përkujdesjes ndaj vendeve historike.
Këto tri probleme, ndërkaq, janë evidentuar edhe në raportin e fundit monitorues të shoqërisë civile në këtë komunë, por që për to është deklaruar dhe opozita e kësaj komune.
Në të vërtetë, Bekim Krasniqi, drejtor ekzekutiv në OJQ-në YAHR, bazuar në raportin monitorues, ka deklaruar se Komuna e Lipjanit nuk po arrin kurrsesi t’i zgjidhë problemet kryesore me të cilat po preokupohen qytetarët e Lipjanit.
Ndonëse në tri problemet e sipërcekura nuk ka pasur rezultate as pushteti i kaluar, sipas Krasniqit, ekzekutivi tanishëm nuk ka bërë ndonjë përpjekje serioze në zgjidhjen e tri problemeve kryesore.
© KOHA Ditore