Tridhjetedy kosovarë, të dyshuar se kanë luftuar përkrah militantëve të grupeve terroriste “Al-Nusra” dhe ISIS do të dalin para drejtësisë, të premten (sot). Emrat e tyre janë radhitur në tri aktakuza të ngritura nga Prokuroria Speciale e Kosovës për shkak të menaxhimit më të lehtë të rastit. Të pandehurit, të cilët vijnë nga regjione të ndryshme nga tërë Kosova dyshohen për vepra të njëjta penale.
Shumica dyshohen se kanë qenë pjesë e organizatave terroriste “Al-Nusra” e ISIS, dhe si të tillë janë trajnuar në kampe të ekstremistëve dhe kanë luftuar përkrah grupeve terroriste në Irak e kryesisht në Siri.
Shumica prej tyre, gjatë deklarimeve dhënë para prokurorit të rastit Blerim Isufaj, e kanë mohuar që kanë qenë pjesë e grupeve terroriste, derisa janë arsyetuar se kanë shkuar në Turqi për biznese të ndryshme, shkruan ‘Zëri’.
Por ka edhe të tillë, që e kanë pranuar se kanë qenë në Siri por thonë se kanë qenë të mashtruar.
Tridhjetedy të dyshuarit, disa në paraburgim, disa në arrest shtëpiak e disa nën masën e lajmërimit në stacion policor, këtë javë kanë qenë në Departamentin për Krime të Rënda të Gjykatës Themelore. Për 21 prej tyre është mbajtur seanca përgatitore derisa seanca për 11 të pandehur të tjerë e paraparë për t’u mbajtur të mërkurën është shtyrë për të premten (sot).
Kujtim Bytyqi (34), Hadi Nura (27), Besim Shabani (33), Betim Ibrahimaj (28), Adil Bushi (28), Ekzon Latifi (21), Jetmir Bushi (25), Artan Kadriu (28), Bekim Halili (41), Zejadin Berisha (31) dhe Jeton Hajdini (40) pritet të paraqiten në gjykatë te gjyqtarja Hajrije Shala. Kjo e fundit, seancën e planifikuar për të mërkurën e ka shtyrë për të premten në mungesë të të akuzuarit Jeton Hajdini. /Zëri/
