Zgjedhjet e jashtëzakonshme shihen si mundësia e vetme për tejkalimin e krizës politike në vend, pasi presidentja Atifete Jahjaga edhe një herë ka dështuar t’i bindë liderët e partive politike për gjetjen e një zgjidhjeje. Jahjaga për herë të parë dje, u ka bërë me dije liderëve se ata duhet të gjejnë në zgjidhje shpejt për tejkalimin e krizës katërmuajshe, në të kundërtën vendi do të shkojë sërish në zgjedhje.
Në anën tjetër, Partia Demokratike e Kosovës dhe Lëvizja “Vetëvendosje” tashmë e kanë bërë të qartë se janë të gatshme për zgjedhje të jashtëzakonshme, përderisa përfaqësuesit e tri partive të Bllokut, LDK, AAK, dhe Nisma vazhdojnë të besojnë në një zgjidhje politike edhe pse nuk kanë bërë të ditur se si do ta gjejnë zgjidhjen për tejkalimin e krizës./zeri/
