Përdoruesit e figurave nëpër mesazhe të ndryshme, së shpejti do t’i kenë në tastierë edhe 72 emoji të ri.

Valltarja e veshur me fustan të kuq më në fund do ta ketë edhe partnerin e saj, me kostum të kaltër, ndërsa nusja do ta ketë edhe dhëndrin me setër, këmishë dhe fjongo, transmeton Telegrafi.

Në mesin e fytyrave, do të shtohet ‘gënjeshtari’ me hundë të gjatë, ‘alergjiku’ me faculetë në hundë, si dhe ‘lakmitari’ të cilit i rrjedhin jargët nga goja.

Dashamirët e kafshëve, do t’i kenë edhe 13 emoji dedikuar botës së egër, pemë dhe perime, ku nuk mungojnë karota, avokado, trëndafili i vyshkur dhe kivi.

Për të pasionuarit me ‘selfie’ është dedikuar një figurë e veçantë, si dhe një zemër e zezë, për ata që i japin fund lidhjes.

Ndryshe, gjatë muajit të kaluar ‘emoji’, është quajtur si gjuha më e kuptueshme dhe që është përhapur më së shpejti ndonjëherë.