Ish-kryeministri dhe ish-presidenti shqiptar, Sali Berisha, ka kritikuar kryeministrin aktual, Edi Rama, për akuzat që ia bëri Kosovës në konferencën e së martës me kancelaren gjermane Angela Merkel.

Rama kritikoi Kosovën për refuzimin e saj që të jetë pjesë e iniciativës së “Ballkanit të Hapur” duke thënë se “ajo po bën teori konspiracioni”.

Berisa ka thënë se qëndrimi i Ramës ishte anti-shqiptar dhe me urdhër të presidentit serb, Aleksandar Vuçiq.

“Miq, dje argati shqipfolës i serbomadhit Vuçiq, shndërroi samitin e Nismës së Berlinit në Tiranë në një samit sherri dhe platformë sulmi të turpshëm ndaj Kosovës dhe kryeministrit të saj. Ai shprehu këtë qëndrim antishqiptar në prani të kancelares Merkel, themeluese e Nismës së Berlinit, e cila jo vetëm nuk shprehu mbështetje për aleancën trilaterale Beograd – Tiranë – Shkup me emrin ‘Ballkani i Hapur’, por deklaroi preras se Procesi i Berlinit nuk ka zëvendësues duke hedhur kështu në kosh të plehrave projektin e serbomadhisë së Aleksandar Vuçiqit dhe argatëve të tij, Zografi Bis dhe Zaev. Ky qëndrim i saj detyroi argatin e Vuçiqit në Tiranë, Zografin Bis të përdorë konferencën e shtypit me kancelaren për ta sulmuar në emër të padronit, Kosovën dhe kryeministrin e saj, si shkakun më kryesor të dështimit të projektit të Serbomadhisë, Ballkani i Hapur”, ka shkruar Berisha në Facebook.

Sipas Berishës, ky projekt është për të vendosur hegjemoninë serbe në rajon.

Ai ka mbrojtur qëndrimin e Kosovës duke thënë se po mbron jo vetëm interesat e saj, por edhe të kombit shqiptar dhe proceset integruese evropiane në rajon.

Iniciativa “Ballkani i Hapur” po refuzohet nga Kosova, Mali i Zi dhe Bosnja e Hercegovina.

Të martën, e pyetur për të zgjedhur në mes të “Ballkanit të Hapur” dhe Procesit të Berlinit, kancelarja Merkel u shpreh se ky i dyti është i pazëvendësueshëm.