| Pranë përfundimit të prodhimit të gjeneratës së parë të modelit sportiv R8, Audi ka përgatitur një seri unike të kufizuar në njësi të quajtur Competition, të cilës i ka futur motor më të fuqishëm. Kompania gjermane Audi planifikon që gjatë vitit të ardhshëm të prezantoi R8 e ri, por para kësaj dëshiron të nxjerr maksimumin nga modeli aktual.
Të gjithë të interesuarve do tu ofrohet versioni R8 Competition që do të jetë i kufizuar në prodhim në vetëm 60 njësi, kurse në Audi thonë se kjo është vetura e tyre serike më e shpejtë që deri më sot kanë prodhuar.
Vetura është e pajisur me sistem të fryrë sportiv me gypa të kuq, fellne të aluminit dhe pllaka frenimi të qeramikës, derisa pjesët anësorë të retrovizorit dhe spojlerët e pasmë me elementet tjera aerodinamike e bëjnë të duket tejet agresive.
Për të qenë versioni Competetion më i shpejti në paletën e R8, nën kapak është futur motori me 5.2 litra V10 që në total prodhon plotë 570 kuaj fuqi.
I gjithë ky motor gjigant është i lidhur me transmisionin S tronik, që i mundëson kësaj veture të kap shpejtësinë nga 0-100 km/h për vetëm 3.2 sekonda, derisa shpejtësia maksimale është e kufizuar në mënyrë elektronike në 320 km/h.
Kjo veturë pritet ti prezantohet publikut gjatë dhjetorit në panairin ndërkombëtarë të veturave në Los Angeles, duke marrë parasysh se kjo veturë fillimisht do të shitet vetëm në Amerikë./Tribuna/ |
