Në këtë bisedë për “Epokën e re”, Beqaj ka theksuar se kjo shtyrje edhe mund të jetë një skenar i ndikuar nga jashtë, pavarësisht deklarimit të faktorit ndërkombëtar se nuk do të ndërhyjë në çështje të brendshme të Kosovës. “Mendoj se është një skenar i ndikuar nga jashtë, që po përpiqet për t’u realizuar, pavarësisht se ndërkombëtarët kanë thënë se nuk do të ndërhyjnë. Shtyrja vetëm sa do ta komplikojë dhe ta thellojë nervozen, asgjë më shumë. Nuk thotë populli kot: ‘Nuk trashet kurbani një ditë para Bajramit’”, ka deklaruar Beqaj.

Ai ka vlerësuar se Lista Serbe vetëm sa po e zbardh pretendimin për t’u bërë ndoshta më e rëndësishme se të gjitha partitë shqiptare individualisht. “Sikur të kishim parti të ndërgjegjshme këtë nuk do ta lejonin. Por, paradoksalisht, deri tashti kemi parë se të gjitha, pa përjashtim, i janë vardisur Listës Serbe pa pasur gatishmëri minimale për t’u takuar mes vete!”, ka theksuar Beqaj, duke shtuar se çdo koalicion që do të varet vetëm nga Lista Serbe është i gjykuar për dështim. “Ajo mund ta prishë koalicionin paszgjedhor, por nuk do të nxjerrë nga humbja koalicionin parazgjedhor, vetëm sa mund t’i përçajë edhe më shumë. Pikërisht ky është synimi i saj”, ka thënë ai. Sipas Beqajt, nuk është problemi te konstituimi i Kuvendit, por zgjidhja kushtetuese është e mbrapshtë. “Kuvendi edhe herën e parë e ka pasur shumicën parlamentare. Problemi është se zgjidhja kushtetuese është e mbrapshtë. Sovranitetin e deputetëve e ka identifikuar me parti, ndërsa sovraniteti buron nga populli”, është shprehur Beqaj.