Ish Kryetari i PDK’së, Hashim Thaçi, përmes një shkrimi në faqen e tij e ka uruar Kadri Veselin për postin e ri në PDK. Ai ka thënë se beson që Veseli dhe lidershipi i PDK’së do t’i forcojnë edhe më shumë institucionet e Kosovës.
“Urime juve dhe anëtarësisë së PDK në hapjen e një kapitulli të ri”- ka shkruar mes tjerash Presidenti Thaçi.
Thaçi po ashtu ka shkruar se është i kënaqur me tranzicionin e PDK’së.
Kam udhëqur me krenari PDK-në mbi 16 vite para se të bëhem President i Republikës. Sot ndihem shumë mirë kur shoh tranzicionin e suksesshëm në lidershipin e PDK.
Kryetarit të ri z Kadri Veseli i uroj zgjedhjen në një proces transparent. Kam besim se ju z.Veseli dhe lidershipi i PDK do të forconi institucionet, do të thelloni me tutje reformat demokratike, do ta fuqizoni unitetin e vendit, kohezionin qytetar si dhe dialogun ndër-partiak, dhe do ta afroni edhe më shpejt Kosovën në NATO dhe BE. Urime juve dhe anëtarësisë së PDK në hapjen e një kapitulli të ri.
