Në kuadër të zbatimit të strategjisë nacionale për luftimin dhe parandalimin e etheve hemorragjike krime kongo (EHKK), nga sot, në territorin e Komunës së Malishevës, ka filluar dezinsektimi selektiv kundër rriqrave, në zonat që cilësohen endemike.

Dezinsektimin, është duke e kryer kompania “Truly Nolen”, e cila është e kontraktuar nga Ministria e Bujqësisë. Ky dezinsektim, po bëhet krahas fushatave tjera, për luftimin dhe parandalimin e EHKK.

Sipas drejtorit të Drejtorisë për Shëndetësi dhe anëtari i Shtabit komunal për luftimin dhe parandalimin e EHKK, Hajdin Berisha, në ditën e parë e këtij dezinsektimi, çdo gjë ka shkuar mirë.

“Ky dezinsektim është duke u kryer krahas aktiviteteve tjera që janë duke u zhvilluar në terren për luftimin e këtij virusi. Aktualisht, janë duke u zhvilluar fushata vetëdijesuese nëpër të gjitha shkollat e Komunës së Malishevës, për rrezikun nga thumbimi i rriqrave, si bartës të virusit që shkakton ethe hemorragjike. Po ashtu nga nesër, fillon edhe cikli i dytë i repelimit të kafshëve, në mënyrë që të parandalohet bartja e rriqrave përmes kafshëve”, tha Berisha.

“Deri më sot, janë regjistruar 84 raste të thumbimeve nga rriqrat, por situata është normale dhe nuk ka vend për shqetësim, pasi asnjë rast nuk është i infektuar, ndërsa në të njëjtën kohë, janë duke u marrë të gjitha masat parandaluese, por edhe masat e trajtimit, për rastet e thumbimeve”, bëhet e ditur në njoftim. /Telegrafi/