Ministra e Arsimit, Shkencës dhe Teknologjisë, Arbërie Nagavci ka reaguar sot pas një rasti dhune në një kopsht në Mitrovicë, ku një edukatore ka goditur me shuplakë një fëmijë.
Nagavci në një postim në Facebook shkruan se menjëherë pas pranimit të informatës, Inspektorati i Arsimit e ka inspektuar këtë institucion parashkollor dhe është informuar se edukatores në fjalë i është ndërprerë marrëdhënia e punës.Lexoni të plotë postimin e Nagavcit:
Dhuna është e pa tolerueshme dhe e dënueshme.
Me keqardhje kemi pranuar lajmin për rastin e ndodhur në një kopsht privat në Mitrovicë, për dhunën e ushtruar ndaj një fëmije nga një edukatore e këtij kopshti.
Sipas legjislacionit në fuqi dhuna është e dënueshme dhe rasti tashmë është denoncuar edhe në organet e hetuesisë.
Uroj që ky të jetë rasti i fundit i ngjashëm në cilindo institucion edukativo-arsimor dhe përgjithësisht i dhunës ndaj fëmijëve.
Si ministre e Arsimit zotohem se do të jemi të pa kompromis ndaj çfarëdo forme të dhunës ndaj fëmijëve. /Telegrafi/
