Bismilahi Rrahmani Rrahim

Në emër të Allahut, Mëshiruesit, Mëshirbërësit.

Të nderuar besimtarë, vëllezër e motra, bashkatdhetarë të dashur!

Në emër të Këshillit të Bashkësisë Islame në Lipjan, së bashku me Imamët e Xhamive, e në emër timin personal, iu urojmë festën e Kurban Bajramit, festën e bekuar me vlerë e rëndësi të veçantë.

Kurban Bajrami është festë ku besimtarët e dallojnë me përkushtim, adhurim e sakrificë për Allahun. Kjo festë na fton të falënderojmë Allahun për mirësitë e shumta që na i dhuron.

“Ne, vërtet, të dhamë ty shumë të mira, andaj, ti falu dhe prej kurban për hirë të Zotit tënd” (Kevther 1-2)

Therja e Kurbanit, punët e mira, solidariteti me të varfërit, kujdesi për jetimët, mëshira ndaj njerëzve, largimi nga e keqja, urrejtja e padrejtësia, janë porosi e kësaj feste.

Kurban Bajrami është simbol i heroizmit, sakrificës, sinqeritetit, devotshmërisë dhe përkushtimit ndaj Zotit. “Tek Allahu nuk arrin as mishi e as gjaku i tyre, por te Ai arrin devotshmëria juaj” (Haxh 37). Kurbani është një mjet që na afron më shumë me Zotin, dhe duke ndarë mishin e kurbanit me njerëzit në nevojë ne jemi më afër pëlqimit të Tij.

Besimtarë të nderuar!

Lutemi që në këtë ditë të bekuar, Zoti të na dhuroj paqë, mëshirë, solidaritet e tolerancë në popullin tonë.

Këtë Festë po e përjetojmë edhe më mirë së bashku me bashkatdhetarët tanë, vëllezërit e motrat që kanë mbushur familjet tona me gjallëri e dashuri, lutemi që të kenë shëndet të mirë, jetë të qetë e me begati e Zoti të i ruaj.

Vëllezër e motra!

Ky Islam na porosit që të jemi produktiv në këtë vend. Mësimet e Muhamedit a.s japin mesazh që: “ Njeriu më i mirë dhe më i dashur tek Zoti është ai i cili është më i dobishëm për shoqërinë”, andaj ju porosis që të kujdesemi për fëmijët, prindërit, familjen e vendin tonë. Të orientojmë jetën tonë sipas besimit dhe porosive nga Zoti i madhëruar, që shpirti jonë të gjejë kënaqësi, kurse lumturia e dashuria të reflektohet gjithandej.

Urime e gëzuar Kurban Bajramin, Allahu ju dhuroftë begati, lumturi, e gëzim në familjet tuaja.

Kryetari: Zaim Baftiu