Artistja amerikane Kristin Bunyard, ka shfrytëzuar pasionin e saj për modën, duke përdorur kockat e kafshëve të ngordhura. Si fryt i punës së saj, u arrit që të krijohet një koleksion bizhuterish sa luksoze, aq edhe të frikshme, nën markën “Ossuaria’.

Kockat me të cilat realizon aksesorët zgjidhen me kujdes nga Kristin dhe e kanë origjinën nga kafshë të ngordhura për shkaqe natyrale apo të shtypura nga makinat. Kristin ka dëshiruar qysh e vogël që të merrej me modën, por ajo studioi për tjetër gjë, duke u marrë me kriminologji.

Pas diplomimit ajo punoi si asistente në autopsi, një botë krejt tjetër nga ajo që ëndërronte kur ishte fëmijë. Gjatë eksperiencës së saj, ajo zhvilloi një admirim të vërtetë për kockat, duke zbuluar elegancën dhe bukurinë e tyre. Nga këtu Kristin nisi të mendojë për linjën e bizhuterive.