Ish-deputeti i Kuvendit të Kosovës, Labinot Tahiri ka bërë të ditur se ka ndarë një shumë prej 5 mijë euro për studentët kosovarë.

Tahiri ka thënë se është pro kërkesave të studentëve për lirim të pagesave, ndërkaq të hollat e ndara tha se do të përdoren për të paguar nga një semestër për afërsisht 200 studentë.

Fjala është për studentët e universiteteve shtetërore, ndërkaq Tahiri tha se do të paguhen semestrat për studentët që janë raste sociale.

“Sot, kemi vendosur që t’i ndajmë për ju të dashur studentë 5000€. Jam pro që të lirohen nga të gjitha pagesat që kërkojnë studentët. Personalisht kaq kam mundësi të bëjë për ju, ku besoj se për 200 studentë, për nga një semestër nëse nuk jam gabim do të dalin këto para. Të paktën do të hiqet barra e pagesës nga FONDACIONI YNË “LABINOT TAHIRI”. Mendoj se do të shkojnë në vendin e duhur për ata me raste sociale! Bëhet fjalë për në Universitetin e shtetit”, shkruan Tahiri.

Tahiri tha se do të vazhdoj që edhe në të ardhmen të përkrah studentët kosovarë. /Telegrafi/