Trupi gjykues në Mitrovicë ia ka zgjatur edhe për dy muaj paraburgimin Oliver Ivanoviqit, i akuzuar për krime ndaj shqiptarëve gjatë vitit 1999-2000.

Paraburgimi do të skadojë më 27 tetor, transmeton Indeksonline.

Ivanoviq për këtë vendim është informuar në spital, ku gjendet për shkak të përkeqësimit të shëndetit pasi që hyri në grevë urie shumëditëshe.

Ivanoviq më shumë se 15 ditë ka duruar urie, së pari në paraburgim, e më pas edhe në spitalin e Mitrovicës.

Grevën e urisë Ivanoviq e ka ndërprerë të shtunën e 22 gushtit.

Oliver Ivanoviq bashkë me katër serbë tjerë akuzohen për krime të rënda lufte gjatë viteve 1999-2000 ndaj popullatës shqiptare në Mitrovicë dhe rrethinë.

Në procesin gjyqësor që ka filluar vitin e kaluar dëshmi kanë dhënë 47 dëshmitarë dhe shumica nga ata e kanë akuzuar drejtpërdrejt Ivanoviqin dhe të tjerët se kanë kryer krime me të cilat ngarkohen.