Që nga ora 10:00 e mëngjesit të sotëm fshati Zllakuqan i Komunës së Klinës ka mbetur pa energji elektrike, kjo pasi që dy shtylla elektrike janë rrëzuar, të cilat ishin të dëmtuara dhe të vjetra.
Jo vetëm që kanë mbetur në terr, por banorët e këtij fshati po ndjehen të rrezikuar, pasi që telat e rrymës elektrike janë shumë pranë shtëpive.
“Që nga ora 10:00 e mëngjesit nuk kemi energji elektrike. Pasi që janë thyer dy shtylla, për të cilat kemi bërë kërkesë edhe më herët për ndërrimin e tyre, pasi që ndjeheshim të rrezikuar për shkak të vjetërsisë së tyre, kemi telefonuar KEDS-in, kanë ardhë në mesditë, mirëpo kanë thënë që nuk kanë kamion për të intervenuar në ndërrimin e shtyllave”, është shprehur Gjokaj.
Përveç këtyre dy shtyllave që tashmë janë thyer, janë edhe dy shtylla të tjera po në këtë fshat që janë në gjendje të tillë, për të cilat Gjokaj shtoi që ka tri vite që kanë bërë kërkesë për ndërrimin e tyre./Indeksonline/
