E ashtuquajtura Zyre për Kosovën në kuadër të Qeverisë së Serbisë, ka mohuar informacionin se ka rënë dakord me autoritetet e Kosovës për ndërtimin e vendkalimeve të përhershme kufitare.

Gjithashtu, sipas komunikatës për media të kësaj Zyre, Prishtina dhe Beogradi nuk kanë arritur marrëveshje edhe për hapjen e dy vendkalimeve të reja kufitare, duke thënë se “këto vendkalime do të jenë neutral karshi statusit”, transmeton Telegrafi.

LEXO PO ASHTU: Arrihet marrëveshja për dy pikëkalime të reja kufitare me Serbinë

“Jemi lodhur me demantimet të vazhdueshme të deklaratave të Prishtinës rreth interpretimit për arritjen e marrëveshjeve, pasi pothuajse pas çdo takimi në Bruksel gjatë gjithë procesit të negociatave midis Beogradit dhe Prishtinës, këta të fundit po vazhdojnë ta keqinformojnë publikun. Duam të theksojmë se në takimin e djeshëm nuk u ra dakord për ‘ndërtimin e gjashtë kalimet të përhershme kufitare’ e as ‘për hapjen e dy kalimeve të reja kufitare, siç shkruan në njoftimin e sotëm të nxjerr nga ana e Prishtinës zyrtare. Por, as termi ‘kalimi kufitar’ nuk është përmendur ndonjëherë gjatë gjithë procesit të bisedimeve në mes të Beogradit dhe Prishtinës në Bruksel”, thuhet në deklaratën e të ashtuquajturës Zyre për Kosovën.

Qeveria serbe shton se në takimin e djeshëm në mes të Beogradit dhe Prishtinës në Bruksel, si pjesë e dialogut teknik për menaxhimin e integruar të kufirit, është rënë dakord për detajet teknike të hapjes së dy kalimeve administrative, e cila u ra dakord gjatë takimit të dy kryeministrave (Kosovës dhe Serbisë) më 21 prilli në Bruksel. /Telegrafi/