“Ai thotë përralla në media, nuk u fejova, unaza ishte dhuratë”

U përfol shumë ndarja e këngëtares Anjeza Branka nga i dashuri i saj, Rolando Sufo.

Edhe më shumë për faktin se ky i fundit, pas ndarjes nga Anjeza, u lidh me kolegen e saj, këngëtaren e njohur Adelina Tahiri, një ngjarje kjo që nuk ndodh përditë mes njerëzve të artit.

Një zhurmë shumë e madhe u krijua, sepse vetëm pak kohë pas lidhjes çifti reklamoi disa imazhe nga një ceremoni për të cilën përflitej se ishte e fejesës, por që gjithsesi nuk kishte ardhur momenti që të deklarohej në publik.

Këngëtarja e njohur Tahiri, në profilin e saj në “Instagram”, gjithnjë e më shumë publikonte foto me Rolandon, por duke ngurruar të flasë në media hapur për jetën e saj private. Nuk shkoi dy muaj që nga lidhja, Adelina dhe Rolando me sa duket janë ndarë. Në një prononcim për mediat, këngëtarja e njohur, Adelina Tahiri, shprehet:

‘’E vërtetë që jam ndarë, ka dy muaj, ndoshta nuk kam qenë asnjëherë e fejuar dhe këtë duhet ta cek se bënë bujë unazat që kanë qenë thjesht dhuratë dhe aq, edhe pse ai nëpër gazeta tregon se jemi akoma bashkë. Nuk është e vërtetë, ka një muaj e gjysmë që nuk jemi më në lidhje’’.

I dashuri dëshmon se janë akoma bashkë

Ja si u shpreh pak ditë më parë për “Gazeta shqiptare” i dashuri i Adelinës, i cili jep versionin e kundërt të saj, pra mohon ndarjen:

“Nuk është absolutisht e vërtetë që jam ndarë nga Adelina. Ne jemi bashkë dhe më të lumtur se kurrë. Është e vërtetë se i kemi hequr fotot tona nga rrjetet sociale, por arsyeja nuk është ndarja. E vërteta është se na lodhi shumë fama. Fakti që isha përditë në faqet e gazetave, m’u shndërrua në diçka stresuese. Unë dhe Adelina vijojmë lidhjen më të lumtur se kurrë”.

Me sa duket, për ndarjen vetëm Adelina paska qenë dakord. (Panorama)