19 dhjetor 2014- Komuna e Lipjanit, Drejtoria për Kulturë Rini dhe Sport ( DKRS) ka shpallur sportistët më të mirë për vitin 2014.
Në ceremoninë e organizuar në Restorant “ Golden Day” në Lipjan, ku ishin të pranishëm, përfaqësues të Komunës së Lipjanit, sportistë, punëtorë, gazetarë dhe mysafirë të shumtë, kryetari i Komunës së Lipjanit, Imri Ahmeti, tha se përzgjedhja e sportistit të vitit dhe sportistëve të tjerë më të mirë, është një akt falënderimi dhe vlerësimi për rezultatet e ndryshme që ata kanë shënuar për vitin 2014.
Kryetari Ahmeti, ka përshëndetur sportistët e dalluar, duke thënë se falë tyre janë arritur rezultate të shënueshme në disiplinat e ndryshme sportive në Lipjan për vitin 2014. Po ashtu ai ka thënë se në vitin tjetër Komuna e Lipjanit, do t’i shpërblejë edhe në formë financiare të gjithë ata sportistë të cilët do t’i sjellin medalje komunës së Lipjanit.
Ndërsa drejtori për Kulturë Rini dhe Sport- Basri Hashani, tha se, komisioni ka shqyrtuar propozimet e dhëna nga Klubet Sportive që veprimtarinë e tyre e zhvillojnë në Komunën e Lipjanit, dhe ka vendosur për 10 sportistët më të mirë për vitin 2014, si dhe ka përzgjedhur Klubin më të mirë, trajnerin më të mirë dhe shpresat e sportit lipjanas.
Drejtori Hashani, ka thënë se rezultatet e treguara gjatë vitit 2014 komisioni vlerësues ka shpallur Erblina Ramën, sportiste e vitit për junior në gjimnastikë dhe Emin Grajçevcin, sportistin e vitit për senior, në atletikë.
Ndërsa në kategoritë tjera çmimet janë ndarë për fituesit në volejboll, basketboll, dhe futboll. Anita Gjemshiti, volibolliste e KV “ Ulpiana”, Fazli Vitia, basketbollist, KB “ Lipjani”, Astrit Rrahmani, futbollist i KF “ Ulpiana”, Eldin Rashiti volejbollist e KV, “ Ulpiana”, Sofie Bllaca volejbolliste e KV “ Ulpiana”, Granit Ejupi, basketbollist KB, “ Lipjani”, Arlind Hasani, futbollist KF” Ulpiana” dhe Leutrim Buzuku, volejbollist në KV “Ulpiana”.
Ndërsa klubi më i mirë i vitit është përzgjedhur , Klubi i Volejbollit “Ulpiana”. Trajneri më i mirë Arsim Bahtiri, gazetar sportiv Arian Duriqi. Për kontributin e dhënë në lojën e volejbollit- Kemajl Tasholli ( veteran i volejbollit), njofton zyra për informim në Lipjan.
