Drejtori i kompanive Tesla dhe Space X, Elon Musk ka një projekt të ri në veprim, pasi ai ka qenë tashmë i suksesshëm me automjetet elektrike Tesla, ndërsa edhe projekti i tij i hapësirës Space X gjithashtu duket të jetë në rrugën e duhur. Por tani Musk e ka në plan të nisë edhe një projekt tjetër shumë ambicioz – Satelitët e Internetit.

Kompanitë si Facebook dhe Google kanë plane për të sjellë qasje të gjerë në internet me satelitë dhe fluturake, të cilat tashmë ne të gjithë i njohim si dronë, dhe me sa duket tani këtyre planeve për hapësirën dhe internetin i është bashkëngjitur edhe Elon Musk, që ka planifikuar diçka të ngjashme.

Sipas një raporti të fundit nga Wall Street Journal, Elon Musk është bashkuar me Greg Wyler, i cili është ish-ekzekutiv i Google dhe gjithashtu një veteran në industrinë e satelitëve.

Plani i tyre është me sa duket të nisin rreth 700 satelitë, ku secili prej tyre do të jetë më pak se 158 kilogram në peshë, që i bie sa gjysma madhësisë së satelitëve më të vogël të cilat janë duke u përdorur komercialisht.

Flota e re e këtyre 700 satelitëve do të jetë rreth 10 herë më e madhe se flota më e madhe aktualisht, e cila menaxhohet nga Iridium Communications Inc, ndërsa projekti i ri thuhet të kushtojë rreth 1 miliard dollarë për tu zbatuar. (Telegrafi)