Kryeministrja e Britanisë së Madhe, Theresa May, do ta njoftojë edhe zyrtarisht Bashkimin Evropian të mërkurën e ardhshme se Britani po largohet përfundimisht.
Qeveria britanike njoftoi sot se do t’i shkruajë letër 27 anëtarëve të BE-së, duke shtuar se pret që negociatat të fillojnë sa më shpejt që është e mundur, transmeton Express.
Ky vendim vjen nëntë muaj pasi populli britanik votoi në një referendum për t’u larguar nga BE-ja, i cili mori 51.9% vota pro dhe 48.1% kundër.
Bisedimet për kushtet e largimit dhe marrëdhëniet e të ardhmes nuk lejohen në bazë të Artikullit 50 të Traktatit të Lisbonës, derisa Britania edhe formalisht i thotë BE-së se po largohet.
Nëse gjithçka shkon sipas negociatave dyvjeçare të përcaktuar nga orari zyrtar, shkëputja e Britanisë nga BE-ja duhet të ndodhë në mars të vitit 2019.
Një zëdhënës i qeverisë britanike ka thënë se ambasadori i Britanisë në BE, Tim Barrow, e ka informuar Këshillin Evropian që udhëhiqet nga Donald Tusk, se Artikulli 50 do të thirret të mërkurën e ardhshme, më 29 mars./Express/
