Mes luftimeve të ashpra në pjesë të rajoneve Donetsk dhe Luhansk, presidenti ukrainas Volodymyr Zelensky ka thënë se situata është e komplikuar përgjatë gjithë vijës së frontit.

Në fjalimin e tij të përnatshëm, Zelensky tha se betejat e ashpra pozicionale vazhdojnë në disa zona dhe situata është veçanërisht e vështirë në rajonin e Donetskut.

“Aktiviteti i pushtuesve atje mbetet në një nivel jashtëzakonisht të lartë – dhjetëra sulme çdo ditë”, tha Zelensky.

Ai shtoi se forcat ruse po pësojnë humbje jashtëzakonisht të mëdha, por rendi i tyre nuk ka ndryshuar, për të arritur kufijtë administrativë të rajonit të Donetskut.

“Ne nuk dorëzojmë asnjë centimetër të tokës tonë atje. Dhe falënderoj të gjithë heronjtë tanë që mbajnë pozicione në Donbas”, tha ai.

Në rajonin jugor të Khersonit, Zelensky tha se njësitë ukrainase po vepronin me kujdes, tërësisht dhe në interes të çlirimit të të gjithë territorit ukrainas.

“Ne jemi duke forcuar pozicionet tona, duke thyer logjistikën ruse, duke shkatërruar vazhdimisht potencialin e pushtuesve për të mbajtur jugun e vendit tonë”, vuri në dukje Zelensky.

Zelensky tha se puna vazhdoi për të rivendosur jetën normale në zonat e çliruara. Në dy rrethe të rajonit të Kharkiv-it, tha ai, më shumë se një mijë familjeve u është rikthyer furnizimi me gaz dhe energji elektrike. Në të gjithë vendin, punimet për riparimin e objekteve energjetike vazhduan. /abcnews.al