Studenti amerikan Otto Warmbier, i cili u mbajt në një burg në Korenë Veriore për 17 muaj të tërë, ka vdekur nga mungesa e oksigjenit dhe gjakut në tru, sipas një mjeku ligjor në Ohio të SHBA-së.
Vdekja e Ottos më 19 qershor të këtij viti u shkaktua nga një lëndim i panjohur që kishte ndodhur më shumë se një vit para vdekjes së tij, ka thënë mjeku ligjor i Hamilton County, Lakshmi Sammarco, dje në një koferencë për media, transmeton Express.
“Ne nuk e dimë se cfarë i ka ndodhur atij”, ka thënë Sammarco.
Studenti i Universitetit të Virginia u mbajt nga Koreja Veriore nga janari 2016 deri në lirimin e tij më 15 qershor. Otto, 22-vjeçar në atë kohë, u rikthye në SHBA në koma.
Në raportin e tij, mjeku ligjor e citon mungesën e oksigjenit dhe gjakut në tru si shkaktarin kryesor të vdekjes së Ottos.
Ndërsa, Koreja Veriore vazhdimisht e ka fajësuar helmimin dhe gëlltitjen e një ilaçi të gjumit për problemet shëndetësore të Ottos dhe i ka hedhur poshtë akuzat se ai ishte torturuar.
Otto vdiq pak ditë pasi mbërriti në Shtetet e Bashkuara. /Express/
