Thomas Strakosha e ka humbur prej disa muajsh vendin e titullarit në formacionin e Lazios me trajnerin Simone Inzaghi që ia ka besuar portën, veteranit Pepe Reina gjatë kësaj periudhe.

Vetëm 8 ndeshje në këtë sezon, në të cilat ka pësuar 14 gola ndërsa në një takim e ka ruajtur portën të paprekur janë shumë pak për një guardian si kuqeziu, i cili ka qenë një titullar i padiskutueshëm te Lazio, gjatë viteve të fundit.

Për këtë arsye Strakosha ka vendosur të ndërrojë ambient në merkaton e verës, madje edhe Lazio është e gatshme ta shesë Strakoshën për të mos e humbur me parametër zero pas një viti pasi kontrata e tij skadon në verën e vitit 2022.

Sipas mediave që qëndrojnë pranë klubit bardhekaltër, dëshira e portierit shqiptar është të transferohet te Borussia e Dortmundit por me shumë gjasa e ardhmja e tij do të jetë në Premier League pasi Strakosha pëlqehet shumë nga drejtuesit e West Ham të cilin po përgatitin një ofertë për kartonin e tij.

Hammers të cilët e këkruan dhe në janar kuqeziun vlerësojnë reflekset e shkëlqyera të Strakoshës dhe duke patur parasysh edhe marrëdhëniet e mira që kanë Lotiton pas blerjes së Felipe Anderson do ta bëjnë një tentativë për shqiptarin.

Titullar i West Ham është polaku Fabianski, i cili feston 36-vjetorin në prill.Strakosha është 11 vite më i ri dhe shihet si një investim shumë i mirë, që jep garanci për shumë vite.

West Ham, që synon të luajë në kompeticionet evropiane sezonin e ardhshëm, do të përgatisë një ofertë në fund të sezonit për Lazion. West Ham, i famshëm për tifozerinë e zjarrtë, mbetet një opsion tundues për 25-vjeçarin. /SS/