Trupat e pajetë të dy të rinjve Dijamant Zabërgja dhe Armela Segashi, pritet të arrijnë sonte në aeroportin e Prishtinës, kështu bëri të ditur në një prononcim për Telegrafin, konsulli i përgjithshëm i ambasadës së Kosovës në Munih të Gjermanisë, Naser Idrizi.

Sipas tij, prindërit dhe motra e Dijamantit kanë ardhur në Kosovë, ndërsa familjarët e Armelës janë nisur për të ardhur në vendlindje.

“Kam kontaktuar me familjen Zabërgja dhe janë në Kosovë, Naimi me gruan dhe vajzën. Edhe familja Segashi janë në atje. Sonte vonë arrijnë trupat e pajetë, ndërsa nesër bëhet varrimi i tyre”, tha Idrizi për Telegrafin.

Ndërkaq, trupi i pajetë i Sabina Sulajt do të varroset në Shqipëri pasi nënën e ka nga Shqipëria.

“Albina Sulaj është nga Shqipëria. Ende nuk e dimë se si do të zhvillohen procedurat”, tha ai.

Ndryshe, Telegrafi merr vesh që trupat e pajetë të dy të rinjve arrijnë rreth orës 23:50, në aeroportin e Prishtinës. /Telegrafi/