Investimet private kanë shënuar rritje në tremujorin e parë të vitit, kryesisht në sajë të rritjes së investimeve të huaja direkte në këtë periudhë, të cilat u rritën me 12.8%.

Ekspertët e ekonomisë shprehen se rritja e investimeve është mbështetur nga një ambient makroekonomik i përmirësuar, ulja e pasigurisë së agjentëve në ekonomi dhe lehtësimi i standardeve të kreditimit.

Bizneset kanë raportuar për përmirësim të gjendjes së tyre financiare, si rezultat i rritjes së kërkesës për produktet e tyre. Në të njëjtën kohë, bizneset kanë rritur normën e shfrytëzimit të kapaciteteve të tyre dhe raportojnë për rritje të numrit të kontratave të reja porositëse. Treguesit e tërthortë, të cilët përafrojnë ecurinë e investimeve private në ekonomi, flasin për rritje të investimeve edhe gjatë tremujorit të dytë.