Ish-kryeministri italian Matteo Renzi ka zyrtarizuar dorëheqjen si lider i Partisë Demokratike, pas rezultateve zhgënjyese në zgjedhje.

Lajmi doli nga burime brenda partisë dhe tashmë u rikonfirmua nga Renzi gjatë një konference për mediat.

“Po lë drejtimin e partisë, duhet të hapet një faqe e re”, tha Renzi në konferencë.

Megjithatë ai nuk iu përgjigj pyetjes së gazetarëve nëse do të rikandidojë si kryetar partie në Kongresin e PD-së.

Matteo Renzi ka shërbyer si kryeministër i Italisë, por dha dorëheqjen e menjëhershme pas një referendumi ku populli italian refuzoi ndryshimet kushtetuese.

Në disa komente të bëra sot, një ditë pas zgjedhjeve kreu i Lëvizjes kryesuese 5 Yjet, Luigi Di Maio tha se “emocionet e tij janë të papërshkrueshme për fitoren”.

Ndërsa lideri i ekstremit të djathtë, Lega Nord, Matteo Salvini tha se: “ekipi me të cilin është e arsyeshme të qeveriset është ai i qendrës së djathtë”. /Shekulli/