Organizata POLIS në kuadër të Programit DemoPOLIS i mbështetur nga Programi Promovimi i Shoqërisë Demokratike (DSP) – që financohet nga Zyra Zvicerane për Bashkëpunim në Kosovë (SCO-K) dhe menaxhohet nga Fondacioni Kosovar për Shoqëri Civile (KCSF), prezantoi dy raporte për Komunën e Lipjanit; “Tenderometri Komunal” dhe “PARAmetri Komunal”.
Raporti “Tenderometri Komunal” përfshinë vlerësimin e performancës së punës së Drejtoratit Komunal të Prokurimit, për periudhën katër mujore janar-prill 2016. Nga ky raport u prezantuan të gjeturat të cilat ishin të përqendruara në tri segmente, në atë të Planifikimit të Prokurimit, Procesin e Tenderimit si dhe në Transparencën e Prokurimit.
Ndërsa në raportin “PARAmetri Komunal” janë paraqitur në mënyrë detale dhe analitike të gjitha shpenzimet buxhetore për tre mujorin e dytë (prill – qershor) 2016.
Të pranishëm në cilësinë e panelistëve ishin Drejtori i Prokurimit Publik z. Adem Duriqi i cili komentoi të gjeturat nga raporti “Tenderometri Komunal”,si dhe Drejtori për Buxhet dhe Financa z. Shkelzen Hajdini i cili komentoi të gjeturat e raportit “PARAmetri Komunal”. Pjesë e këtyre diskutimeve ishin edhe Anëtarët e Kuvendit Komunal dhe perfaqësues nga OSCE.
Të dhënat e paraqitura nga POLIS, u panë si të nevojshme dhe si një mundësi më e mirë që i kontribuon transparencës dhe llogaridhënies, që mund të ndikoj në avancimim të qeverisjes lokale.
