Operacion i ngjashëm si në rajonin e Ferizajt, saktësisht në Komunën e Shtërpcës, është duke u zhvilluar edhe në rajonin e Prishtinës.
Policia aktualisht është duke zhvilluar operacion në këto dy rajone, ku deri tani janë bastisur disa prona në komunën e Shtërpcës, në lidhje me dyshimet për krim dhe korrupsion, saktësisht kundër të dyshuarve për ryshfet me ndërtimet në Brezovicë.
Një aksion i ngjashëm është duke u zhvilluar edhe në rajonin e Prishtinës, ka bërë të ditur për “Zërin” policia e Kosovës.
“Policia e Kosovës ka në proces një operacion policor në rajonin e Ferizajt dhe të Prishtinës, dhe tani për tani nuk mund te japim informacione tjera”, ka thënë zëdhënësi i policisë për rajonin e Prishtinës, Daut Hoxha.
Më herët, kryeprokurori i Prokurorisë Themelore të Ferizajt, Shukri Jashari, ka konfirmuar se operacioni është duke u zhvilluar dhe deri tani nuk ka të arrestuar.
“Po, është duke u zhvilluar një aksion. Ka të bëjë për keqpërdorim të detyrës zyrtare, pra ryshfet. Ende s’ka të arrestuar, meqenëse bastisjet po vazhdojnë ende”, ka thënë Jashari.


