OBRM-PDUKM-ja përmes një kumtese thekson se Talat Xhaferi me ndihmë të LSDM-së po e uzurpon Kuvendin dhe se po bën terror në shtëpinë ligjvënëse, njofton Telegrafi Maqedoni.

“Në Kuvendin e Maqedonisë, i cili është bërthama e demokracisë parlamentare ata duan të zbatojnë diktaturë, të vendosi kush kur do të flet, dhe të mos respektojnë Rregulloren për punë. Me intervenime të dhunshme të sigurimit, LSDM dhe Xhaferi e pamundësojnë debatin dhe duan të ndalojnë proceset demokratike pikërisht në vendin që është zemra e demokracisë”, thonë nga OBRM-PDUKM.

Sipas kësaj partie, LSDM-ja përmes skandaleve, terrorit dhe shkeljes së Ligjit Zgjedhor dëshiron të largohet nga debati për çështjet kyçe politike.

Ata thonë se me këtë mënyrë të punës, LSDM-ja do të deligjitimohet nga qytetarët në zgjedhjet e ardhshme lokale.