Agjencia e Akreditimit e Kosovës (AAK) i ka akredituar në nivel institucional për 3 vjet tri universitetet e reja të themeluara nga Qeveria e Kosovës, atë të Mitrovicës, Gjilanit dhe Gjakovës si dhe Universitetin e Prishtinës për 5 vjet.
Përmes një komunikate për medie, AAK ka bërë të ditur se në nivel institucional janë akredituar edhe tri institucione private të arsimit të lartë derisa nuk janë akredituar 28 programe nga Bartësit Privat të Arsimit të Lartë, nuk janë akredituar 9 programe në institucionet publike derisa janë shtyrë për një fazë tjetër 3 vendime në institucionet publike të arsimit të lartë dhe 4 në ato private.
Janë akredituar 42 programe në nivel bachelor, master dhe PhD në Universitetin e Prishtinës.
Në universitetin e Prizrenit “Ukshin Hoti” janë akredituar 4 programe të studimit, në Universitetin e Pejës “Haxhi Zeka” janë akredituar 3 programe, në Universitetin e Mitrovicës “Isa Boletini” janë akredituar 21 programe studimi. Kurse, në Universitetin e Gjilanit janë akredituar 7 programe të studimit.
Për akreditim dhe riakreditim në vitin e kaluar kishin aplikuar mbi 190 programe të studimit në institucionet publike e private dhe dhjetëra institucione nga të dy kategoritë.
