Protesta e filluar sot në mesditë në Shkup, kundër dënimit të 6 të arrestuarve në rastin “Monstra” kishte dalë nga kontrolli, duke shkaktuar kaos nëpër rrugët e Shkupit dhe duke lënë pasoja të mëdha materiale nëpër rrugët e kryeqytetit.
Mediat atje raportonin përplasje mes protestuesve dhe forcave policore të cilat siguronin objektet kryesore shtetërore dhe godinën e gjykatave.
Ndërsa pasdite raportohet se nga kjo protestë kanë mbetur 20 të lënduar dhe gjashtë të arrestuar.
Për këtë ka folur edhe Ministria e Punëve të Brendshme, e cila në një konferencë për media, shpalosi detaje për protestën.
Sipas zëdhënësit të kësaj ministrie, Ivo Kotevski, gjatë protestës që u mbajt sot kanë mbetur 20 të lënduar dhe 6 të arrestuar.
“6 persona nga protestuesit janë arrestuar, njëri prej të cilëve është ankuar për lëndime dhe është dërguar në spital. Gjithashtu është dëmtuar ekspozitura e ‘Komercijallna Bankës’, disa automjete dhe një dyqan. Gjatë ditëve në vijim me ndihmën e filmimeve tona dhe me ndihmën e filmimeve të mediave do të vazhdojmë identifikimin e atyre që morën pjesë në protesta dhe u rrahën me policinë”, është shprehur Kotevski.
Ai ndër të tjera ka shtuar se, policia po punon për të ndjekur ata persona që kanë organizuar protestën, që sipas, Koteskit, shkaktoi trazirë dhe rrëmuja.
