Policia e Filipineve i ka gjetur 1529 breshka të gjalla, të cilat ishin të lidhura dhe të mbyllura në disa valixhe. Ato ishin lënë në aeroport nga persona të panjohur.
Zyrtarët e doganave i gjetën katër valixhe në Manile, të cilat ishin të mbushura me disa lloje të breshkave që janë të mbrojtura me ligj, përfshirë breshkat këmbëkuqe dhe breshkat “sulcata”.
Punëtorët e aeroportit kanë njoftuar se këto valixhe kishin ardhur nga një aeroplan nga Hong Kongu përmes një udhëtari filipinas dhe më pas janë lënë pa u vërejtur në Aeroportin Ndërkombëtar të Manilas.
Besohet se vlera e përgjithshme e këtyre breshkave në treg është rreth 70 mijë euro. Këto breshka përdoren për mishin e tyre dhe shërimin e sëmundjeve përmes metodave të mjekësisë tradicionale në disa vende të Azisë.
Filipinet kanë ligje të rrepta për trafikimin e kafshëve. Personi që i ka transportuar këto breshka mund të dënohet me dy vjet burgim dhe gjobë prej 3400 eurosh, shkruan “The Guardian”, transmeton Gazeta Express.
