Kryetari i Komunës së Lipjanit, z. Imri Ahmeti, së bashku me bashkëpunëtorët e tij, sot ka bërë homazhe dhe ka vendosur buqetë me lule pranë varrit të dëshmorit të kombit, Ibrahim Krasniqi, në fshatin Smallushë, në nderim të përvjetorit të rënies së tij, ku njëkohësisht u bë edhe përurimi i pllakës përkujtimore.

Me këtë rast, kryetari Ahmeti theksoi rëndësinë e ruajtjes së kujtimit për dëshmorët si një vlerë të përhershme të identitetit dhe lirisë sonë.

“Sakrifica e dëshmorëve është gurthemel i lirisë që gëzojmë sot. Kujtimi për ta është obligim moral dhe institucional, por edhe frymëzim për të ndërtuar një shoqëri më të drejtë dhe më të bashkuar. Nderimi për jetën dhe veprën e tyre na obligon të punojmë çdo ditë për zhvillimin, mirëqenien dhe të ardhmen e vendit tonë,” tha kryetari z. Imri Ahmeti.

Lavdi e përjetshme për të gjithë ata që ranë për liri!