Nën përkujdesjen e Kryetarit të Komunës së Lipjanit, Imri Ahmeti, sot në Qendrën Kulturore “Tahir Sinani” në Lipjan është mbajtur Akademi Përkujtimore, në nderim të 20-të vjetorit të rënies së dëshmorëve dhe martirëve të komunës së Lipjanit. Qytetarë të shumtë morën pjesë në këtë akademi për të nderuar të rënët, duke përkujtuar kështu 20-të vjetorin e terrorit dhe masakrave të forcave serbe në Komunën tonë, njofton Komuna.
Në këtë rast, Kryetari i Komunës së Lipjanit, Imri Ahmeti tha se përgjithmonë do të kujtohen e nderohen të gjithë të rënët për lirinë e vendit tonë, por obligimi ynë i përbashkët është jo vetëm shënimi i përvjetorëve por edhe përkushtimi, angazhimi konsistent, i përhershëm moral dhe institucional i punës me përgjegjësi për të realizuar amanetin, ëndrrën, idealin e gjithë dëshmorëve dhe martirëve tanë.
“Nuk duhet të ndalemi vetëm në përkujtime e nderime, POR nderimi më i madh u bëhet gjithë dëshmorëve e martirëve duke punuar pastër e pahile, duke ruajtur e duruar njëri tjetrin, duke zhvilluar vendin tone.” ka thënë ndër të tjera kryetari Ahmeti.
Ai po ashtu shtoi se ne lartësojmë e nderojmë gjithë dëshmorët e martirët tanë kur fëmijët tanë, brezat e sotshëm të ndihen mirë në shtetin e tyre, ne i çmojmë e i lartësojmë gjithë dëshmorët e martiret tanë kur Kosovën tonë, vendin tonë e bëjmë shtet të sigurt ku mund të punohet e të jetohet lirshëm siç janë shtet e integruara evropiane siç e deshtën dëshmorët e martirët tanë, njofton komuna. Në emër të familjeve ka folur Arbnor Gashi.
Akademia është përmbyllur me këngë e valle të ndryshme kushtuar kësaj dite.
