25 milionë euro nga një marrëveshje e nënshkruar sot mes ministrit të Financave, Hekuran Murati dhe guvernatorit të Bankës për Zhvillim të Këshillit të Europës (CEB), Carlo Monticelli, janë destinuar për krijimin e një sistemi gjithëpërfshirës të banimit social.

Siç u tha nga Ministria e Financave, projekti në fjalë ka fokus të veçantë familjet e cenueshme të shoqërisë të cilat kanë të ardhura të ulëta pa zgjidhje banimi.

Përmes marrëveshjes parashihet shndërrimi i ndërtesave ekzistuese në banesa të reja sociale dhe të përballueshme, renovimi i shtëpive të cilat janë në pronësi të familjeve me të ardhura të ulëta si dhe ndërtimi i banesave të reja kolektive sociale.

Në ceremoninë e nënshkrimit, Murati shprehu se “projekti për banimin social do të garantojë akomodimin e dinjitetshëm dhe të përballueshëm për familjet e cenueshme”.

Ndërsa, Guvernatori Monticelli deklaroi se “kjo iniciativë do të ndihmojë në realizimin e objektivit të përgjithshëm të vendit për krijimin e banimit social gjithëpërfshirës për qytetarët e Kosovës”.

“Të dyja palët u pajtuan që të thellojnë bashkëpunimin në mënyrë që qytetarët e Kosovës të kenë akomodim të përballueshëm, efiçient dhe të sigurt”, u tha në komunikatë./Express/