Leonardo DiCaprio të mërkurën në një darkë humanitare në San Trope, ka arritur të mbledhë më shumë se 25 milionë dollarë për shoqatën e tij bamirëse, e cila merret me mbrojtjen e vendbanimeve natyrale të florës dhe faunës së egër.

Sipas komunikatës së këtij fondi, ylli i Hollivudit e ka hapur darkën zyrtare me një paralajmërim se ‘që nga periudha e dinozaurëve, llojet e bimëve dhe kafshëve kurrë nuk janë zhdukur kaq shpejt dhe në numër kaq të madh”.

DiCaprio i ka ftuar 500 të ftuarit në këtë darkë që të mbrojnë bio-diversitetin, ndërsa ankandin e ka hapur duke ofruar në shitje motorin e tij “Harley Davidson” me nënshkrimin e Martin Scorse dhe Robert De Niro.

Këngëtari Bono, i cili ka interpretuar një këngë me Julian Lennon, djalin e ish anëtarit të grupit “Beatles”, John Lennon, ka ofruar në shitje kitarën e tij për një shumë prej 1 milionë dollarë.

Skulptura e Damien Hirst-it, i është shitur miliarderit Leni Blavatniku për më shumë se 6 milionë dollarë, ndërsa një pikturë të Picaso-s, e ka blerë milioneri jug-afrikan Patrice Motsepe për 1 milion euro.

Aktorët, këngëtarët dhe personalitetet tjera nga bota e spektaklit, për biletën hyrëse kanë paguar mes 7500 dhe 130 mijë dollarë./Zëri/