“Serbia është fqinji jonë, e jo armiku jonë. Me rëndësi është të vazhdojmë rrugën e bashkëpunimit që për mua është i pakthyeshëm dhe shumë i rëndësishëm”, ka thënë kryeministri i Shqipërisë, Edi Rama, në një intervistë për Top Channel.
Duke bërë lojë fjalësh, mediet serbe thonë se Rama, duke pranuar që Serbia është shtet fqinj i Shqipërisë, ka pranuar se Kosova është pjesë e Serbisë.
“Kështu e pranoi se Kosova është pjesë e shtetit tonë, pasi në kufi me Shqipërinë është krahina jonë jugore, Kosova”, shkruajnë mediet e Serbisë, transmeton Telegrafi.
Këtë lojë fjalësh e bën edhe kryetari i Këshillit për Kosovën në Kuvendin e Serbisë, Milovan Drecun.
“Z. Rama për një gjë ka të drejtë, sepse Serbia dhe Shqipëria janë fqinj, pasi Kosova është e jona. Rama ose ka pranuar këtë fakt, ose, Zoti na ruajt, beson se Kosova është pjesë e Shqipërisë!? Nëse e ka menduar këtë të dytën, atëherë deklaratat e tij janë mbulesë për tezën shqiptaromadhe që e mbron vazhdimisht dhe kudo. E, kjo është në kundërshtim me të drejtën ndërkombëtare”, thekson Drecun. /Telegrafi/