Komuna e Lipjanit në krye me Kryetarin z.Imri Ahmeti, për herë të parë merr pjesë në Konferencën e Investitorëve për mundësitë e zhvillimit të turizmit lokal.
Me këtë rast, Komuna prezantoi zyrtarisht Master Planin për Zhvillimin e Zonës së Goleshit, një projekt ambicioz që synon ta shndërroj këtë zonë në një destinacion të qëndrueshëm turistik.
“Ky plan parashikon zhvillimin e infrastrukturës së nevojshme për organizimin e garave ndërkombëtare në sportin e paraglajdit dhe në sporte të tjera fushore duke krijuar kështu mundësi reale për investime në turizmin malor dhe natyror” tha Ahmeti.
Ndër të tjerash Ahmeti theksoi se Lipjani posedon resurse natyrore të pasura dhe atraktive, të cilat përbëjnë një bazë të fortë për zhvillimin e turizmit lokal.
“Kodra e Goleshit, një nga asetet tona më të çmuara natyrore tashmë ka një master plan të gatshëm, i cili përfshin të gjithë komponentët e nevojshëm për ta shndërruar atë në një zonë funksionale për turizëm gjithëvjetor”.
Poashtu gjatë konferencës, u prezantuan mundësitë konkrete për investime në përputhje me master planin, modelet e zhvillimit të turizmit të qëndrueshëm dhe gjithëvjetor dhe promovimin e aktiviteteve në natyrë si paragliding, ecje malore , çiklizëm etj. LipjaniNews
