I pari i Lipjanit, Imri Ahmeti, ka ftuar të gjithë qytetarët e Komunës së Lipjanit të cilët janë borxhlinjë ndaj Komunës së Lipjanit në kategorinë e Tatimit në Pronë që të përfitojnë nga Ligji mbi faljen e borxheve e cila mundësi përfundon më 02.09.2016
Ahmeti po ashtu ka apeluar tek qytetarët që ta shfrytëzojnë këtë të drejtë ligjore sepse tatimpaguesit e Komunës së Lipjanit kanë mundësi shumë të mira të përfitimit nga ligji për faljen e borxheve. Janë dy forma të përfitimit nga falja e borxheve.

Forma e parë është pagesë e përnjëhershme dhe e dyta është formë e marrëveshjes kontraktuale me Komunën e Lipjanit, ku personat fizik mund të bëjnë pagesën deri në 18 këste, ndërsa për personat juridik deri në 12 këste.

Në formën e parë tatim paguesi lirohet nga ndëshkimet dhe kamatat, por duhet të bëjë pagesën e borxhit total deri në fund të vitit 2014, edhe për periudhën 2009-2014, falen ndëshkimet dhe kamatat, gjithnjë në rastin se kjo pjesë e obligimeve paguhet përnjëherë. Ndërsa, në formën e dytë me këste, falën ndëshkimet deri në vitin 2008, por jo edhe kamata.

Por, në rast se pala nënshkruan marrëveshje dhe nuk i përmbahet asaj, atëherë, gjendja kthehet në fillim, ka thënë ndër të tjera Kryetari Ahmeti.