Kryetari i Komunës së Lipjanit, z. Imri Ahmeti, sot ka marrë pjesë në shpërndarjen e motokultivatorëve për bujqit lipjanas. Gjatë këtij aktiviteti, ai uroi përfituesit dhe theksoi angazhimin e komunës për përmirësimin e kushteve të punës dhe për nxitjen e zhvillimit ekonomik të sektorit bujqësor.

“Sektori i bujqësisë është një nga prioritetet tona kryesore, pasi ndikon drejtpërdrejt në mirëqenien e qytetarëve tanë. Shpresoj që këto pajisje të kontribuojnë në përmirësimin e kushteve të punës për të gjithë fermerët. Angazhimi ynë për bujqësinë do të vazhdojë, dhe jemi të përkushtuar të mbështesim fermerët me pajisje bujqësore moderne për të lehtësuar punën dhe për të nxitur rritjen e këtij sektori,” tha kryetari Ahmeti, njofton Komuna e Lipjanit.

Përfaqësuesja e Islamic Relief Kosova vlerësoi bashkëpunimin e ngushtë me Komunën e Lipjanit, duke theksuar se ky projekt është vetëm një nga shumë projektet që po realizohen në fushën e bujqësisë, të cilat synojnë mbështetje në zhvillimin e sektorit të bujqësisë.

Fermerët përfitues shprehën mirënjohje për ndihmën e ofruar, duke e konsideruar këtë mbështetje të rëndësishme për përmirësimin e kushteve të punës së përditshme në bujqësi.