Kryetari i Komunës së Lipjanit, Imri Ahmeti, tha si sot e përherë ndër breza do nderohen përjetësisht dëshmorët e martiret e kombit, vepra sublime e të cilëve faktoi e ndërtoi themelet e lirisë, themelet e shtetësisë së vendit tonë.
Në Qendrën Kulturore “ Tahir Sinani”, në Lipjan është mbajtur Akademi Përkujtimore, me rastin e 14 qershorit, ditës së Dëshmorëve të Komunës së Lipjanit.
“Sot jemi bashkë për të nderuar e do nderojmë përjetësisht gjithë dëshmorët e Ushtrisë Çlrimtare të Kosovës, por sot e përherë ne i nderojmë duke ndërtuar e zhvilluar vendin tonë , synime e amanete të gjakut të dëshmorëve e të gjithë brezave për liri e mëvetësi të trojeve tona.Nderi më i madh i′u bëhet sot dëshmorëve duke punuar drejt. T′a durojmë njëri tjetrin, t′a vlerësojmë të mirën nga e keqja, t′a gjykojmë negativen e vlerësojmë progresin, të mos e përkrahim inatisht as të mos e urrejmë politikisht askënd, të demaskojmë e dënojmë të keqen, korrupsionin e hajninë, pavarësisht nga kush vjen, të pranojmë mendimin ndryshe e t′a duam vendin tonë –shtetin tonë”, ka thënë ndër Kryetari Ahmeti.
Kru i Lipjanit, po ashtu ka thënë se gjithë sot ne që e gëzojmë lirinë, shtetësinë tonë vlerësojmë, kujtojmë, nderojmë, të kaluarën, sakrificën, luftën heroike të djemve e vashave dëshmore të kombit por përherë të na mbaj ndërgjegjja për idealet e dëshmorëve.
“Ne duhet të jemi të përgjegjshëm karshi gjakut dhe djersës të gjeneratave të tëra, të cilat luftuan për liri, pavarësi dhe demokraci. Shteti ka rregullat e veta, ato rregulla janë themeli i shtetit tonë.
Ne duhet t′a duam shtetin tonë, duhet t’i qëndrojmë besnik shtetit tonë. Bashkë t’i kundërvihemi të keqes. Të forcojmë të mirën”, ka thënë ndër të tjera Kryetari Ahmeti.
Akademia është përmbyllur me program të pasur kulturor e artistik, kushtuar dëshmorëve.
Po ashtu, Kryetari i Komunës së Lipjanit Imri Ahmeti i shoqëruar me bashkëpunëtor, gjatë ditës së sotme kanë nderuar duke bërë homazhe tek varreza e dëshmorëve dhe kanë vendosur kurora lulesh.
