Pamje të publikuara nga një think-tank në Uashington, shfaqin faktin që Kina është duke e ndërtuar aeroplanmbajtësen e tretë dhe më të madhe në botë, që sipas analistëve mendohet se do ta sfidojë superioritetin e SHBA-së në Azinë Lindore.
Qendra për Studime Strategjike dhe Ndërkombëtare (CSIS) në Uashington, lëshoi pamjet të cilat u shkrepën gjatë muajit prill, ku shfaqen ndërtimet kineze për këtë luftanije, të cilat po zhvillohen në Shanghai.
Kina nuk e ka konfirmuar se është duke e ndërtuar gjigandin e saj detar. Por Pentagoni tha javën e kaluar që puna për ndërtimin e saj ka filluar, e që me gjasë do të jetë më i madh se dy aeroplanmbajtëset e kaluara të ndërtuara nga shteti gjigand i Azisë.
Pamjet nga CSIS, i kanë mbështetur pretendimet e Pentagonit. Fotot satelitore tregojnë se aeroplanmbajtësja kineze, e tipit 002, është më e vogël se ajo amerikane, por që në rast se prodhohet tipi 003, ajo do ta ketë superioritetin ndaj asaj amerikane. Ende mbetet e paqartë nëse kjo e fundit do të ketë kapacitet nuklear, raporton Fox News, transmeton Gazeta Express.
Ndryshimi i marrëdhënieve politike e ka motivuar qeverinë kineze që t’i modernizojë forcat e saja të armatosura. Ushtritë amerikane dhe aziatike, gjithmonë e më shumë janë në kërkim të qëllimit se pse Kina po e ndërton këtë.
Ndërkohë, disa analistë mendojnë se ndërtimi i saj është një formë që Kina e ka zgjedhur që ta minojë strategjinë e superioritetit amerikan në Azinë Lindore.
Ian Storey, analist nga Singapori, tha për Reuters se aeroplanmbajtësja kineze e tipit 002, ka mundësi që i ka stresuar marrëdhëniet mes Kinës e SHBA-së, për shkak të rrezikut që shtetet rreth Kinës mund ta kenë.
“Nëse ndërtohet tipi 003, atëherë çdo luftanije japoneze apo indiane do të jetë e papërfillshme” tha Storey.
Aeroplanmbajtësja që po ndërtohet, sipas think-tankut, nuk ka gjasë që të jetë gati për përdorim deri në vitin 2020. Ndërkohë mediat shtetërore kineze, kanë raportuar Kina ka nevojë që ti ketë 6 aeroplanmbajtëse, për ta siguruar territorin e saj./GazetaExpress/
