Një katërvjeçar kinez, i pasionuar pas vizatimit, bashkë me të atin kanë mbetur të ngujuar në një aeroport të Koresë së Jugut, meqë vogëlushi e kishte përdorur pasaportën e babës si fletore vizatimi.
Fëmija, që kishte qenë me prindërit në pushim në Korenë e Jugut, duke mos pasur fletë të tjera që të shuante pasionin, kishte shkarravitur në faqet e pasaportës së të et.
“Bllokun” e kishte stolisur me figura njerëzish dhe kafshësh dhe trajta të tjera të pazakonta. Babës po ashtu ia kishte ‘ngjitur’ mjekrën, shikimin ia kishte ‘mprehur’, e buzët bërë ca më të trasha…
Vogëlushi, shihet qartë, ka gjasë të bëhet artist i madh, nëse ia del të largohet nga aeroporti.
I ati me të birin janë ndaluar në një aeroport në Korenë e Jugut, sepse i ati kishte “dokument me foto të paidentifikueshme” dhe për këtë arsye s’mund të kthehej në Kinë në kohën e planifikuar.