Për shkak të pandemisë më shumë kohë kaloni në shtëpi se kurrë më parë. Mësimi zhvillohet nëpërmjet TV-së, bisedat me miqtë i kemi kaluar në video-thirrje, ndërkaq që kur punojnë nga shtëpia edhe koha e punës ka kaluar tetë orët e zakonshme. E keni kuptuar poentën
Para ekrani kalojmë shumë kohë, mirëpo në disa gjëra siç është puna nuk mund të ndikojmë, por gjithsesi mund të përpiqemi të mbrojmë sytë tanë nga të gjitha ato ekrane me të cilët përballemi çdo ditë.
Drita LED sot gjendet gjithandej rreth nesh dhe vazhdimisht jemi të ekspozuar. Pa marrë parasysh që në kuptimin ekologjik është më e pranueshme, ekspozimi ndaj dritës së kaltër ka pasoja të shumta negative në shëndetin tonë, transmeton Telegrafi.
Çfarë është drita e kaltër?
Drita e diellit përmban rreze të kuqe, të portokallta, të verdha, të gjelbra dhe të kaltra dhe nuanca të shumta të këtyre ngjyrave me energji dhe gjatësi të ndryshme valore.
Rrezet e dritës të gjatësive të valëve kanë më pak energji (rreze të kuqe), ndërkaq rrezet e shkurtra kanë më shumë energji (rrezet e kaltra).
Gjatësia e valëve të dritës së kaltër është prej 80 deri në 500 nm dhe është drita më e fuqishme e spektrit të dukshëm që kalon përmes thjerrëzave dhe kornesë dhe bie direkt në retinë.
Drita e kaltër është më së shumti e pranishme në dritën e diellit, por e emetojnë gjithashtu edhe llambat e kursimit të energjisë në ambiente të mbyllura dhe drita e bardhë LED që është e pranishme në ekranet e sheshta të televizorëve, monitorëve, tabletëve, kompjuterëve, telefonave të mençur dhe aparateve të tjera digjitale.
Si ndikon drita e kaltër negativisht në sytë tuaj?
Meqenëse syri nuk bllokon dritën e kaltër dhe ajo depërton deri te retina, ekziston rreziku nga dëmtimi i qelizave të shumta të ndjeshme ndaj dritës.