Mbi 67 mijë aplikacione të i ish-pjesëtarëve të Ushtrisë Çlirimtare të Kosovës, vazhdojnë të verifikohen nga Komision Qeveritar për njohjen e statusit të dëshmorit të kombit, invalidit, veteranit, pjesëtarit dhe të internuarit të luftës së UÇK-së. Edhe pse listat me emrat e ish-pjesëtarëve të UÇK-së, është premtuar që të publikohen në muajin qershor të këtij viti, komisioni ende nuk ka arritur që të kryej verifikimin e të gjitha Zonave Operative të UÇK-së.

Komisioni momentalisht është duke verifikuar numrin e ish-pjesëtarëve të UÇK-së, në Zonën Operative të Llapit.

Ushtrues detyre i kryetarit të Organizatës së Veteranëve të Ushtrisë Çlirimtare të Kosovës, Smajl Elezaj, ka thënë se deri më tani janë verifikuar gjysma e brigadave, e në të cilat përfshihen edhe Njësitet dhe Shtabet lokale.

Ai tha se numrin e të verifikuarve nuk mund ta bëjnë publike në këtë kohë.

Elezaj ka theksuar se pas publikimit të listave me emrat e veteranëve të cilët fitojnë statusin e veteranit, ata që kanë pakënaqësi do të mund të dërgojnë vërejtje.

“Deri më tani është kryer gjysma e brigadave, aty nuk përfshihen vetëm brigadat por janë edhe njësitet dhe në shtabet lokale. Komisioni i verifikimit të veteranëve është duke e kryer punën mirë, mirëpo vetë verifikimi është kompleksiv edhe për shkak që është numri shumë i madh i aplikacioneve”, ka thënë ai.

Elezaj ka thënë se në Zonën Operative të Drenicës ende nuk ka filluar verifikimi.

Ai tha se arsye e kësaj vonese të verifikimit është se komisioni është marrë më shumë me komunat e tjera në vend.

Ai ka shtuar se ata të cilët përfitojnë nga ky ligj do të jenë veteranët të cilët janë të pa punë, kurse veteranët e punësuar do të kenë beneficione si sigurime shëndetësore, lehtësim në dogana, administratë.

E veteranët të cilët kanë ndërruar jetë pas lufte, 70 për qind të ndihmës do të mund t’i marrin familja e ngushtë.

Ndryshe, Elezaj nuk ka dhënë një datë të saktë për publikimin e këtyre listave.

Ai tha se pas përfundimit të verifikimit, të gjithë veteranët dhe pjesëtarët e UÇK-së, do të jenë përfitues të benificioneve të cilat i parasheh edhe ligji tashmë i miratuar në Kuvendin e Kosovës. /KP/