Ish-gjyqtari spanjoll, Juan Andujar Oliver, e ka quajtur të padrejtë dhe aspak korrekt vendimin e VAR-it për t’ia dhënë Sevillës një penallti në barazimin 2:2 me Real Madridin të dielën.

Gjatë rishikimit në ekranin e VAR-it të një penalltie të fituar nga Karim Benzema, gjyqtarët erdhën në përfundim se gjatë një aksioni paraprak në pjesën tjetër të fushës kishte prekje të topit me dorë në zonë nga mbrojtës i Real Madridit, Eder Militao, transmeton Gazeta Express.

Në vend se Real Madridi të fitonte penallti, gjyqtari akordoi penallti për Sevillën. Ivan Rakitic shënoi dhe e kaloi skuadrën e tij në epërsi prej një goli, para se Eden Hazard ta barazonte rezultatin në 2:2 në fund të kohës shtesë.

Por – sipas Andujar Oliver që tani punon si ekspert i referimit në të përditshmen spanjolle MARCA – topi e preku në krah Militaon para se ta prekte në dorë.

Sipas tij, Real Madridi meritoi penallti për ndërhyrjen e Bonos në Benzeman dhe kjo Sevilla.

“Së pari topi e godet krahun e Militaos, e pastaj dorën e tij”, tha Andujar.

“Ishte plotësisht e rastësishme. Prandaj për mua nuk është e mjaftueshëm për të dhënë penallti”, theksoi ai.

“Loja është dashur të vazhdonte dhe të përfundonte me penallti të Bonos ndaj Benzemas”, shtoi ai. /Gazeta Express/